೩೫ನೇ ಸಂಪುಟದ ಆಶಯ ನುಡಿ

ಡಾ. ಧನಂಜಯ ಕುಂಬ್ಳೆ 

ಸಹ ಪ್ರಾಧ್ಯಾಪಕರು

ಎಸ್.ವಿ.ಪಿ. ಕನ್ನಡ ಅಧ್ಯಯನ ಸಂಸ್ಥೆ, 

ಮಂಗಳೂರು ವಿಶ್ವವಿದ್ಯಾನಿಲಯ, ಮಂಗಳಗಂಗೋತ್ರಿ

ಆಶಯ ನುಡಿ

ಬಿತ್ತಿ : ಭಾವದ ಬೀಜ, ಸಾಹಿತ್ಯದ ಬೆಳೆ

      ಮನುಷ್ಯನ ಅಂತರಂಗದಲ್ಲಿ ಮೂಡುವ ಪ್ರತಿಯೊಂದು ಚಿಂತನೆಯೂ ಒಂದು ಬೀಜ. ಆ ಬೀಜವು ಮಾತಿನ ಮಣ್ಣಿನಲ್ಲಿ ಮೊಳಕೆಯೊಡೆಯಬಹುದು; ಬರಹದ ನೆಲದಲ್ಲಿ ಬೇರುಬಿಟ್ಟು ಬೆಳೆಯಬಹುದು. ಆ ಬೆಳವಣಿಗೆಯ ಸಾರ್ಥಕ ರೂಪವೇ ಸಾಹಿತ್ಯ, ಈ ದೃಷ್ಟಿಯಿಂದ "ಬಿತ್ತಿ" ಎಂಬ ಶೀರ್ಷಿಕೆ ಕೇವಲ ಒಂದು ಪತ್ರಿಕೆಯ ಹೆಸರಲ್ಲ; ಅದು ಸೃಷ್ಟಿಯ, ಕನಸಿನ ಮತ್ತು ಅಭಿವ್ಯಕ್ತಿಯ ಸಂಕೇತವಾಗಿದೆ. ಬಿತ್ತದೆ ಬೆಳೆಯಿಲ್ಲ; ಭಾವವನ್ನು ಬಿತ್ತದೆ ಬರಹ ಹುಟ್ಟುವುದಿಲ್ಲ. ಚಿಂತನೆಯನ್ನು ಬಿತ್ತದೆ ಜ್ಞಾನ ಫಲಿಸುವುದಿಲ್ಲ. ಹೀಗಾಗಿ ಮಂಗಳೂರು ವಿಶ್ವವಿದ್ಯಾನಿಲಯದ ಎಸ್.ವಿ.ಪಿ. ಕನ್ನಡ ಅಧ್ಯಯನ ಸಂಸ್ಥೆಯ ವಿದ್ಯಾರ್ಥಿಗಳ ಈ ಸಾಹಿತ್ಯ ವೇದಿಕೆಗೆ "ಬಿತ್ತಿ" ಎಂಬ ಹೆಸರು ನೀಡಿರುವುದು ಅತ್ಯಂತ ಅರ್ಥಪೂರ್ಣವೂ ಕಲಾತ್ಮಕವೂ ಆಗಿದೆ. ಅದಕ್ಕಾಗಿ ವಿಭಾಗದ ಹಿರಿಯರ ಕಾಳಜಿಯನ್ನು ನಾನು ಕೃತಜ್ಞತೆಯಿಂದ ಸ್ಮರಿಸುತ್ತೇನೆ.

      ವಿದ್ಯಾರ್ಥಿ ಜೀವನವು ಕೇವಲ ಪಠ್ಯಕ್ರಮ ಕಲಿಕೆ ಮಾತ್ರವಲ್ಲ; ತನ್ನೊಳಗಿನ ಪ್ರತಿಭೆಯನ್ನು ಕಂಡುಕೊಳ್ಳುವ, ಆ ಪ್ರತಿಭೆಗೆ ರೂಪಕೊಡುವ ಮತ್ತು ಅದನ್ನು ಸಮಾಜದ ಮುಂದೆ ಅನಾವರಣಗೊಳಿಸುವ ಕಾಲವೂ ಹೌದು. ಈ ಮಹತ್ತರ ಕಾರ್ಯವನ್ನು ಕನ್ನಡ ವಿಭಾಗವು ಹಲವು ವರ್ಷಗಳಿಂದ ಯಶಸ್ವಿಯಾಗಿ ನಿರ್ವಹಿಸುತ್ತ ಬಂದಿದೆ. ವಿಶ್ವವಿದ್ಯಾನಿಲಯದ ಕನ್ನಡ ಅಧ್ಯಯನ ಸಂಸ್ಥೆಯ ವಿದ್ಯಾರ್ಥಿಗಳಷ್ಟೇ ಅಲ್ಲದೆ ವಿವಿಧ ವಿಭಾಗಗಳ ವಿದ್ಯಾರ್ಥಿಗಳಿಗೂ ತಮ್ಮ ಲೇಖನ, ಕವಿತೆ, ಕಥೆ, ವಿಮರ್ಶೆ ಹಾಗೂ ಚಿಂತನ ಬರಹಗಳ ಮೂಲಕ ಭಾಗವಹಿಸಲು ಅವಕಾಶ ಕಲ್ಪಿಸುತ್ತಿರುವುದು ಈ ಪತ್ರಿಕೆಯ ವೈಶಿಷ್ಟ್ಯವಾಗಿದೆ. ಹೀಗೆ ಬಿತ್ತಿ ವಿವಿಧ ಜ್ಞಾನಶಾಖೆಗಳನ್ನು ಒಂದುಗೂಡಿಸುವ ಸೃಜನಶೀಲ ಸಂವಾದದ ವೇದಿಕೆಯಾಗುತ್ತಿದೆ.

      ಇಂದಿನ ತ್ವರಿತಗತಿಯ ಯುಗದಲ್ಲಿ ಓದುವ ಅಭ್ಯಾಸ ಕಡಿಮೆಯಾಗುತ್ತಿದೆ ಎಂಬ ಮಾತು ಕೇಳಿಬರುತ್ತದೆ. ಆದರೆ ಅದಕ್ಕಿಂತಲೂ ಗಂಭೀರವಾದ ಸವಾಲು ಬರೆಯುವ ಅಭ್ಯಾಸದ ಕ್ಷೀಣತೆ. ಬರವಣಿಗೆ ಎನ್ನುವುದು ಕೇವಲ ಭಾಷಾ ಕೌಶಲವಲ್ಲ; ಅದು ಚಿಂತನೆಯ ಶಿಸ್ತು, ಅನುಭವದ ಸಂಸ್ಕರಣೆ ಮತ್ತು ವ್ಯಕ್ತಿತ್ವದ ವಿಕಾಸ, ಬರೆಯುವವನು ತನ್ನನ್ನೇ ತಾನು ಓದುತ್ತಾನೆ; ತನ್ನ ಕಾಲವನ್ನು ಪ್ರಶ್ನಿಸುತ್ತಾನೆ; ತನ್ನ ಸಮಾಜದೊಂದಿಗೆ ಸಂವಾದ ನಡೆಸುತ್ತಾನೆ. ಆದ್ದರಿಂದ ವಿದ್ಯಾರ್ಥಿಗಳಲ್ಲಿ ಬರವಣಿಗೆಯ ಆಸಕ್ತಿ ಮೂಡಿಸುವುದು ಎಂದರೆ ಕೇವಲ ಲೇಖಕರನ್ನು ಸೃಷ್ಟಿಸುವುದಲ್ಲ, ಜಾಗೃತ ನಾಗರಿಕರನ್ನು ರೂಪಿಸುವುದಾಗಿದೆ. ಈ ನಿಟ್ಟಿನಲ್ಲಿ ಬಿತ್ತಿ ಯುವ ಮನಸ್ಸುಗಳಲ್ಲಿ ಅಭಿವ್ಯಕ್ತಿಯ ಧೈರ್ಯವನ್ನು, ಚಿಂತನೆಯ ಆಳವನ್ನು ಮತ್ತು ಸಾಹಿತ್ಯದ ಸಂವೇದನೆಯನ್ನು ಬೆಳೆಸುವ ಕಾರ್ಯದಲ್ಲಿ ನಿರಂತರವಾಗಿ ತೊಡಗಿಸಿಕೊಂಡಿದೆ.

      ಮೂವತ್ತೈದು ಸಂಪುಟಗಳನ್ನು ಪೂರೈಸಿ ಹೊಸ ವಾರ್ಷಿಕ ಸಂಚಿಕೆಯನ್ನು ಓದುಗರ ಮುಂದೆ ತರುತ್ತಿರುವುದು ಒಂದು ಗಮನಾರ್ಹ ಸಾಧನೆ. ಇದರ ಹಿಂದೆ ಶ್ರಮಿಸಿದ ವಿದ್ಯಾರ್ಥಿ ಸಂಪಾದಕ ಪ್ರಥ್ವಿ ಮತ್ತು ಜಗದೀಶ ಇವರಿಗೆ, ಸಂಪಾದಕ ಮಂಡಳಿಯವರಿಗೆ, ಮಾರ್ಗದರ್ಶಕ ಅಧ್ಯಾಪಕರಾದ ಡಾ.ಯಶುಕುಮಾರ್ ಅವರಿಗೆ ಹಾಗೂ ಬರಹಗಾರ ವಿದ್ಯಾರ್ಥಿಗಳ ಪರಿಶ್ರಮಕ್ಕೆ ಅಭಿನಂದನೆಗಳು.

ತಮ್ಮ ವಿಶ್ವಾಸಿ       

ಡಾ. ಧನಂಜಯ ಕುಂಬ್ಳೆ