ಸಂಚಿಕೆ - ೦೫

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಸಕ್ಕರೆ ಗಿಕ್ಕರೆ ಇಲ್ಲ ಅಂತ, ಸಕ್ಕರೆ ತರಕೋಗಿದ್ದೆ 

ಸಕ್ಕರೆ ತಂದ ಹುಡುಗಿ ನೀನು, ಸಕ್ಕರೆನೆಲ್ಲಿ ಇಟ್ಟಿದ್ದೆ 

ಇರುವೆ ಗಿರುವೆ ತಿಂದವಂತ, ಇರುವೆ ಗೂಡಲ್ಲಿ ಇಟ್ಟಿದ್ದೆ ॥ ೧ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಉಪ್ಪು ಗಿಪ್ಪು ಇಲ್ಲ ಅಂತ, ಉಪ್ಪು ತರಕೋಗಿದ್ದೆ 

ಉಪ್ಪು ತಂದ ಹುಡುಗಿ ನೀನು, ಉಪ್ಪನೆಲ್ಲಿ ಇಟ್ಟಿದ್ದೆ 

ಕರಗಿ ಗಿರಗಿ ಹೋಗ್ತಿತಂತ, ನೀರಿನೊಳಗೆ ಇಟ್ಟಿದ್ದೆ ॥ ೨ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಹಾಲು ಗೀಲು ಇಲ್ಲ ಅಂತ, ಹಾಲು ತರಕೋಗಿದ್ದೆ 

ಹಾಲು ತಂದ ಹುಡುಗಿ ನೀನು, ಹಾಲನೆಲ್ಲಿ ಇಟ್ಟಿದ್ದೆ 

ಬೆಕ್ಕು ಗಿಕ್ಕು ಕುಡಿದವಂತ, ಬೆಕ್ಕಿನ ಮುಂದೆ ಇಟ್ಟಿದ್ದೆ ॥ ೩ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಬಳೆ ಗಿಳೆ ಇಲ್ಲ ಅಂತ, ಬಳೆ ತರಕೋಗಿದ್ದೆ 

ಬಳೆ ತಂದ ಹುಡುಗಿ ನೀನು, ಬಳೆನೆಲ್ಲಿ ಇಟ್ಟಿದ್ದೆ 

ಒಡೆದು ಗಿಡೆದು ಹೋಗ್ತತಂತ, ಕಲ್ಲಿನಡಿಯಲ್ಲಿ ಇಟ್ಟಿದ್ದೆ ॥ ೪ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಬೆಲ್ಲ ಗಿಲ್ಲ ಇಲ್ಲ ಅಂತ, ಬೆಲ್ಲ ತರಕೋಗಿದ್ದೆ 

ಬೆಲ್ಲ ತಂದ ಹುಡುಗಿ ನೀನು, ಬೆಲ್ಲನೆಲ್ಲಿ ಇಟ್ಟಿದ್ದೆ 

ಮಕ್ಕಳು ಗಿಕ್ಕಳು ತಿಂದವಂತ, ಮಕ್ಕಳ ಕೈಯಲ್ಲಿ ಕೊಟ್ಟಿದ್ದೆ ॥ ೫ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಸೀರೆ ಗೀರೆ ಇಲ್ಲ ಅಂತ, ಸೀರೆ ತರಕೋಗಿದ್ದೆ 

ಸೀರೆ ತಂದ ಹುಡುಗಿ ನೀನು, ಸೀರೆನೆಲ್ಲಿ ಇಟ್ಟಿದ್ದೆ 

ಇಲಿ ಗಿಲಿ ಹರಿದವಂತ, ನಾನೇ ಹರಿದು ಇಟ್ಟಿದ್ದೆ ॥ ೬ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಸರ ಗಿರ ಇಲ್ಲ ಅಂತ, ಸರ ತರಕೋಗಿದ್ದೆ 

ಸರ ತಂದ ಹುಡುಗಿ ನೀನು, ಸರನೆಲ್ಲಿ ಇಟ್ಟಿದ್ದೆ 

ಅರೆದು ಗಿರೆದು ಹೋಗ್ತತಂತ, ನಾನೇ ಅರೆದು ಇಟ್ಟಿದ್ದೆ ॥ ೭ ॥

ಸುಂದರವಾದ ಹುಡುಗಿ ನೀನು, ಸಂತೆಗ್ಯಾಕೋಗಿದ್ದೆ 

ಗಂಡ ಗಿಂಡ ಇಲ್ಲ ಅಂತ, ಗಂಡನ ತರಕೋಗಿದ್ದೆ 

ಗಂಡನ ತಂದ ಹುಡುಗಿ ನೀನು. ಗಂಡನೆಲ್ಲಿ ಇಟ್ಟಿದ್ದೆ 

ಓಡಿ ಗೀಡಿ ಹೋಗ್ತಾನಂತ, ಮುಸುರೆ ತಿಕ್ಕಕ್ಕೆ ಇಟ್ಟಿದ್ದೆ ॥ ೮ ॥

ಜನಪದ ಸಂಗ್ರಹ - ಎಸ್.ಎಸ್.ವಿ. ಜಗದೀಶ, ಎಂ.ಎ. ದ್ವಿತೀಯ ವರ್ಷ, ಎಸ್.ವಿ.ಪಿ. ಕನ್ನಡ ವಿಭಾಗ